2017-imi inuusuttunut ilinniarfiit
Saqqummersitami uani Kalaallit Nunaanni inuusuttuaqqanut ilinniarfinni ilinniartut taamaallaat eqqartorneqarput. Inuusuttut nunani allani ilinniarfianni ilinniartut pillugit paasissutissat Naatsorsueqqissaartarfiup Kisitsisaataasivianut aaneqarsinnaapput.
2017-imi inuusuttut ilinniarfianni ilinniarlutik naammassisut ikinnerusut
2017-imi inuusuttut ilinniarfianni ilinniarlutik naammassisut 703-upput. 2011-ip kingorna aatsaat taamak inuusuttut ilinniarfiini naammassisut ikitsigipput. Inuusuttut ilinniarfianni ilinniarlutik naammassisut 2005-imiit 2016-imut amerlatsikkiartorsimapput, 2016-imilu qaffasinnerpaamiilluni. 2016-imiit 2017-imut inuusuttut ilinniarfianni ilinniarlutik naammassisut 12 pct.-inik appariaateqarput. 2017-imi appariaateqaraluarlutik 2005-imut sanilliullugu inuusuttut ilinniarfianni ilinniarlutik naammassisut 76 pct.-inik amerlanerusimapput.
Titartagaq 1. 2005-imiit 2017-imut Kalaallit Nunaanni inuusuttut ilinniarfianni ilinniarlutik naammassisut
Najoqqutaq: Naatsorsueqqissaartarfik – Kisitsisaataasivimmi kisitsit takukkit (http://bank.stat.gl/UDNISC11D).
2017-imi appariaat annerpaaq ilinniarnertuunngorniarfinniippoq, ilinniarnertuunngorniarfinni ilinniakkamik naammassinnissimasut amerlassusaat 19 pct.-inik appariaateqarluni. Tamanna 2016-ip aasaagaa inersimasunuinnaq ukiup ataatsip ingerlanerani ilinniagaqalernissamut piareersartitsisarnerup atorunnaarsinneqarneranik peqquteqarpoq. 2017-imi ilinniarnertuunngorniarfinni ilinniakkamik naammassisut 298-iupput, 2005-imut sanilliullugu 110 pct.-inik ilinniarnertuunngorsimasut qaffariaateqarput.
2017-imi inuussutissarsiornermik ilinniarfinni naammassisut ikilipput. 2015-imi inuussutissarsiornermik ilinniarfinni ilinniarlutik naammassisut amerlassusaat qaffasinnerpaaffini tikippaa, 2017-imi inuussutissarsiornermik ilinniarlutik naammassisunut 2015-imut sanilliullugit 9 pct.-inik appariaateqarput. 2017-imi inuussutissarsiornermik ilinniarlutik naammassisut 405-iupput. Taakku 2005-imut sanilliullugit 58 pct.-inik qaffariaateqarput.
Inuussutissarsiornermik ilinniarfinni ilinniarnermik aallussisut ikinnerusut
2017-imi Kalaallit Nunaanni ilinniartut 2.179-iupput, tamanna 2016-imitut qaffasitsigaaq. 2011-imi ilinniartunut sanilliullugu 2017-imi inuussutissarsiornermik ilinniartut 300-ngajannik tassa 11 pct.-inik appasinnerupput. Appariaat inuussutissarsiornermik ilinniarfinni ilinniartut ikinnerunerannik peqquteqarpoq.
2016-imi inuussutissarsiornermik ilinniarfinni ilinnialersut amerlassusaat qaffasinnerpaaffissani tikippaa
2017-imi inuusuttut ilinniarfianni ilinnialerlutik aallartittut[1]1.236-upput, 2016-imut sanilliutissagaanni inuusuttut ilinniarfianni ilinnialersut 4 pct.-inik appariaateqarput. Ingammik inuussutissarsiornermik ilinniarfinni ilinnialersut amerlassusaat appariaateqarput. Inuussutissarsiornermik ilinniarfinni aallartittut 2017-imi appariarsimanerat 2016-imi aallartittut aatsaat taamak amerlatigisimanerannik ilaatigut tunngaveqarnera eqqarsaatigineqassaaq.
2017-imi ilinniarnertuunngorniarfik nutaaq”Ilinniagaqalernissamut piareersarluni ukiut marluk atuarneq inersimasunoortoq”-mik taaneqartoq aallartinneqarpoq, tassanilu ilinniartut 23-t aallartipput. Ilinniarnertuunngorniarfinni aallartittut 2017-imi 2016-imituulli inissisimapput. Tassunga tunngatillugu maluginiaqquneqarpoq inuusuttut ilinniarlutik aallarteriaannaat ikilisimaneri (innuttaasut taamatut ukiullit ikiliartorsimaneri).
Ilinniarnertuunngorniarfinni ilinniarlutik aallartittartut agguaqatigiissillugit 20-nik ukioqartarput, inuussutissarsiornermik ilinnialersut 27-ngajannik ukioqartarlutik aallartittartut.
Titartagaq 2. 2005-imiit 2017-imut Kalaallit Nunaanni ilinniakkamik aallaartitsisartut
Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDNISC11A).
Tabeli 1. 2013-imiit 2017-imut inuusuttut ilinniarfiini ilinniartut ilinniagaqarfiit suussusaanut aamma naatsorsuutit inerneranut immikkoortillugit
Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDNISC11A, http://bank.stat.gl/UDNISC11B, http://bank.stat.gl/UDNISC11D)